Аҧсадгьыл ахь ахынҳәразы аҳәынҭқарратә еилакы аҧшьгарала, есышықәса Ҭырқәтәылантәи Аҧсныҟа ҧсшьара иаауеит аҧхынтәи аҿар рлагер «Ахьышьҭрахь» иалахәу ҳџьынџьуаа. Алагер ахԥатәи агәыҧ Аҧсныҟа иааит нанҳәамза 23 азы. Ҳџьынџьуаа 60-ҩык ыҟоуп: урҭ рахьтә Аҧсуа культуратә центрқәа Рфедерациа 30-ҩык ыҟоуп, Кавказтәи акультуратә центрқәа Рфедерациа 30-ҩык ыҟоуп.

Апроект хықәкыс иамоуп аҳәаанырцә инхо ҳдиаспореи ҳареи ҳаимадара арӷәӷәара, рҭоурыхтә ҧсадгьыл разхьарҧшра, агәыбылра абжьаҵара. Ҳџьынџьуаа ара рыҟазаара иалагӡаны алшара рымоуп Аҧсны аҭоурых, ҳмилаҭтә культура, ҳдоуҳатә беиарақәа рҭынха, аҧсуа жәлар рыбзазара уҳәа ҳҵас-ҳқьабзқәа лабҿаба рбара, рыжәлантәқәеи дареи реиқәшәара, реибадырра. Ҳашьцәа, бзиала шәаабеит шәыҧсадгьыл аҟны! Шәыҧсшьарамшқәа хирла имҩаҧыжәгааит!’ Мҩамш!