Аԥсадгьыл ахь ахынҳәразы аҳәынҭқарратә еилакы анапхгареи аусзуцәеи ари амш аҽны иргәаладыршәоит  Аԥсны амцашыра ианалагылаз, еиҳа ианыуадаҩыз аамҭазы Ҭырқәтәылантәи, Шьамтәылантәи, Иорданиантәи, Нхыҵ-Кавказтәи Ареспубликақәа рҟынтә иааны иҳацибашьуаз ҳџьынџьуаа.  

Нхыҵ-Кавказтәи Ареспубликақәа инарҷыданы, ақырҭқәа ирҿагыланы хатәгәаԥхарала еибашьуан Урыстәылеи егьырҭ аҳәынҭқаррақәеи рҟынтәи еиуеиԥшым амилаҭқәа.

Аԥсны Аџьынџьтәылатә еибашьра анцоз  1992ш.-1993ш.рзы ҳтәыла ахьчара иааит 2000-ҩык инареиҳаны хатәгәаԥхарала еибашьуаз, урҭ рахьтә 51-ҩык «Аԥсны Афырхаҵа» ҳәа ахьӡ рыхҵоуп, 247-ҩык Леон иорден ранашьоуп, 623-ҩык аибашьцәа «Агәымшәаразы амедал». Аибашьра цонаҵы иҭахеит 260-ҩык инареиҳаны хатәгәаԥхарала еибашьуаз.