Ҭырқәтәылатәи Ареспубликаҿы иҟоу Аԥсны Аҳәынҭқарра Азинмчы нагӡа змоу Ахаҭарнакра 30 ш. ахыҵит.

1994 ш. хәажәкырамза 1 азы, Аԥсны Аҳәынҭқарра раԥхьатәи Ахада Владислав Арӡынба иаԥшьгарала, Ҭырқәтәылатәи Ареспублика Сҭампыл ақалақь аҟны иаԥҵан Аԥсны Аҳәынҭқарра Азинмчы нагӡа змоу ахаҭарнакра. Акыршықәса инеиԥынкыланы Аԥсны Ахаҭарнакра напхгара аиҭон Владимир Аҩӡба, иара убас еиуеиԥшым аамҭақәа рзы ари анапхгара рнапы ианын Инар Гыцбеи Вадим Ҳаразиеи. Ҳазҭагылоу аамҭазы Ҭырқәтәылатәи Ареспублика аҟны Аԥсны Аҳәынҭқарра ахаҭарнакс дыҟоуп Ибраҳим Аҩӡба. Ахаҭарнакра ахадаратә усура азырхоуп аԥсуа жәлар рмилаҭтә хаҿра аиқәырхара, рҭоурыхтә ԥсадгьыл радыԥхьалара, аимадара арӷәӷәара. Аԥсадгьыл ахь ахынҳәразы аҳәынҭқарратә еилаки Ҭырқәтәыла иҟоу Аԥсны Аҳәынҭқарра Ахаҭарнакреи еиуеиԥшым ахырхарҭақәа рыла аусеицзуреи аимадареи рыбжьоуп, азеиԥш проектқәа рҳәаақәҵаразы аҭагылазаашьақәа аԥырҵоит. Ҳҳәынҭқарреи хауаажларреи рзы аҵак ду змоу ари аҭоурыхтә мшы аԥхьаҟа аԥеиԥш лаша амазааит. Владислав Арӡынба игәыӷрақәа здиҳәалоз аԥшьгарақәа зегьы нагӡара рықәны иҟалааит! Адунеи иқәынхо аԥсуаа зегьы рыԥсадгьыл гәакьа Аԥсны ԥшӡа иагымзааит