Аҧсны шьҭоуп Аахыҵ Кавказ аҩада-мраҭашәаратәи ахәҭаҿы аӡиасқәа Ҧсоуи Егри рыбжьара, уи алада-мраҭашәаратәи ахәҭа Амшын Еиқәа иаҿықәуп. Аҧшаҳәа аура 210 км. еиҳауп, адгьыл еизаданы инашьҭуп, ласы-лассы иуҧылоит иҭбаау, бӷанҷссала ихҟьоу амра ацәиааларҭа ҭыҧқәа. Аҩада Урыстәыла аҳәаа иадуп, амрагыларахь – Қырҭтәыла.
Аҧсны аҳауа лыҧшаахуп, уи ҟазҵо аҧшаҳәа аҿықәзаареи ашьхеибаркыра ҳаракқәа рыҟазаареи роуп.
Аҧшаҳәаҿы аҳауа цәаакуп, исубтропикатәуп. Ажьырныҳәамзазы атемпература +10 С рҟынӡа ихалоит. Нанҳәамзазы атемпература +26-и +30-и рыбжьара иҟоуп. Ақәаӡы илеиуа ахыҧхьаӡара бжьаратәла шықәсык 1500 мм. итәоит. Ашьхараҿы иубаратәы иҟоуп аҳракыратәи аихшарақәа шыҟоу, урҭ роуп изыхҟьо ашьха ҭыҧ еиҧшымзаарақәа рҿы иаҳҧыло аҳауатә еивыгара дуқәа. Ашьхақәа рҿы асубтропикатә ҳауа уҧылоит 400 м. аҩаӡаранӡа. Асыршәқәа шьҭоуп 2700 – 3000 м. иҩаӡо аҳракырақәа рҿы.
Ареспублика адгьылҵакыра аӷьырак (75% рҿынӡа) рымпыҵакуп Аҧсны аҩадатәи аҳәаа ҟазҵо Кавказтәи Ашьхеибаркыра Хадақәа – Гагратәи, Бзыҧтәи, Аҧснытәи, Кәыдрытәи ашьхеибаркырақәа. Зегьы раасҭа иҳараку шьхоуп – ашьха Домбаи-Ульген (4046 м.). Ашьхеибаркыра Хадақәа рыҟнытә Аҧсныҟа уаазго Клыхәратәи (2781 м.) Марыхәтәи (2739 м.) ашьхахыҵырҭақәа роуп. Ладантә мрагыларахь, Аҧсныҟа, маҷ-маҷ аҽеиҵакуа инашьҭуп Колхидатәи акаршәра. Уи ипоу акаршәра ацәаҳәа аҧшаҳәа иаваршәны, аӡиас Кәыдры шыҟоу аҩадантә мраҭашәарахь инашьҭуп. Ашьхақәеи акаршәрақәеи рыбжьара абахә маҟақәа цоит. Аҧсны ирацәоуп аҳаҧқәа (Аҟәраанқәа рҳаҧы, Абраскьыл иҳаҧы, Анаҟәаҧиатәи аҳаҧы).
Аҧсны, Гагра ақалақь азааигәара, иҟоуп адунеи аҟны зегьы раасҭа иҵаулоу аҳаҧы – Крубера-Ворониа (2080 м. иҵаулоу). 6 км. Гагра ақ. иналганы ишьҭоуп иблахкыгоу Мамзышьха захьӡу ашьха.
Аӡиасқәа зегьы Амшын Еиқәа иалалоит. Зегьы раасҭа идуқәоу ракәны иҟоуп – Кәыдры, Бзыҧ, Кьалашәыр, Гәымсҭа аалӡга– урҭ ӡы дуқәоуп, аӡқәа рымч маҷӡам (рымчра 3,5 млн. квт. еиҳауп). Рыӡқәа рызҳара зыбзоуроу аӡқәеи аси роуп; ааҧыни аҧхыни аӡиасқәа ихыш-хыҵәаны илеиуеит. Ашьхақәа рыҟны иҟоуп аӡиақәа Риҵеи Амҭҟьали.
Аҧсны иуҧылоит 2000 шәаҧыџьаҧ хкы. Бнала ихҟьоу ареспублика адгьылҵакыра 55 % инаӡоит.