Иреиҳау аҵарадырра аиуразы зеиӷьыҟам аҭагылазаашьа еицаҧырҵеит Аҧсны Аҳәынҭқарра арепатриациазы аҳәынҭқарратә еилаки Ҭырқәтәыла иҟоу аҧсуа культуратә центрқәа рфедерациеи.

Аҧсны еиуеиҧшым ақалақьқәа рҟынтәи онлаин ала 29 рзаҳал роуит. Аттестациа ҩ-етапкны имҩаҧысуан: 90 зҵаара рыла ишьақәгылоу атесттә ҧышәарақәеи аиҿцәажәареи. 

Аттестациа алҵшәақәа иаарласны икьыҧхьхоит Аҧсадгьыл ахь ахынҳәразы аҳәынҭқарратә еилакы асаит аҟны. (https://repatriatera.org/)

Аҧышәаратә комиссиа шьақәгылан быжьҩык рыла, иаҳҳәозар:

- Аҧсадгьыл ахь ахынҳәразы аҳәынҭқарратә еилакы ахантәаҩы Ҳаразиа В. Н;

- ахантәаҩы ихаҭыҧуаҩ Багаҭелиа А. О;

- Аҵареи абызшәатә политикеи рминистрра азеиҧш ҟәша аспециалист хада Ҷолокәуа А. Д;

- Аҧсны Аҳәынҭқарра арепатриациазы аилак жәларбжьаратәи аҟәша аиҳабы Хәытаба И. Л;

- аиҳабы аамҭала инапынҵақәа назыгӡо, аинформациа - аналитикатә ҟәша аспециалист хада Аҩӡба А. Л;

- ҳџьынџьуаа ашәҟәы рҭагалара аҟәша аспециалист хада Ҳашыг С.А;

- жәларбжьаратәи аҟәша аҧышәахысҩы Ӷәынџьиа А. Г.

Аилыркаазы:

 Анатолиатәи ауниверситет( Anadolu Universitesi) , Есқьишьеҳиртәи аҳәынҭқарратә университет( Ҭырқәтәыла) , атәылаҿы зегь реиҳа идуу, иара убас адунеи аҿы астудентцәа рхыҧхьаӡара аҧшьбатәи аҭыҧ ахьааннакылоу, зыхьӡ нагоу Иреиҳау ҵараиурҭоуп.