Ацентр аҧҵараҿы аиҿкааратә усқәа адгылара арҭеит Аҧсны Аҳәынҭқарра Ахада иабжьгаҩ Рисмаг Аџьынџьал, иара убас ауаажәларратә усзуҩы Асҭамыр Папцаа, ашәҟәыҩҩы Дмитри Габалиа. Исҳақ-Садық Қаимаз (Қәышьха) абизнес-модель аус адиулоит, убри алагьы ацентр аныҟәгаразы иахәҭоу ахарџь ахишәаауеит. Ацентр ахыбра қьырала агаразы аконтракт шьақәиргылеит, уаҟа асахьаҭыхратә галереиагьы аус аулоит.
Исҳақ-Садық Қаимаз имч-илша зегьы адиҵоит Хельсенки еиҿкаау акультуратә еилазаара ҧхьаҟа агаразы, ахатәы сахьаҭыхратә галереиеи Аҧсуа культуратә центри ахҿыхразы иахәҭоу аҭагылазаашьа аҧиҵоит.
2021ш. иалагӡаны Ацентр аҟны имҩаҧган абас еиҧш иҟаз ауснагӡатәқәа:
- Хельсенки ашәҟәыҧхьарҭа хадаҿы иаҧҵан аҧсуа дыга шәҟәқәқәа рыҟәша;
- Финлиандиа Аҵара аминистрраҟны имҩаҧган заанаҵтәи абжьгарақәа Шьамтәылатәи аҧсуа-адыга хҵәацәа рҭаацәарақәа аҧсшәеи адыга бызшәеи дырҵаразы аҭагылазаашьа аҧҵаразы;
- Хельсинки ашәҟәыҧхьарҭа хадеи агалереиеи рҟны имҩаҧган Аҧсны иазкыз ацәыргақәҵақәа ҩба;
- Хельсенки амуниципалтә мчрақәа рақәшаҳаҭхарала имҩаҧган амитинг-џәыргақәҵақәа ҩба, урҭ хықәкыс ирыман Аҧсны Аҳәынҭқарра Ахьыҧшымра азхаҵара Жәларбжьаратәи аилазаара азҿлымҳара анаҭарц;
- Финлиандиатәи Иреиҳау Амузыкатә ҵараиурҭа хадеи Европа иҟоу аҵараиурҭа дуқәа ируаку Сибелис ихьӡ зху Академиеи рҟны заанаҵтәи аицәажәарақәа мҩаҧган аҧхьаҟатәи аусеицуразы;
- Хельсенки Кәмпул амикрораион иатәу асахьаркыратә журнал "Kumposti" аҟны икьыҧхьын Исҳақ-Сады Қаимаз иусуреи иаартыз Ацентри ирызкыз анҵамҭа.
Хыхь еиқәаҳаҧхьаӡақәаз рнаҩс, иазгәаҭатәуп, Исҳақ-Садық Дуган-иҧа, Европа автомашьына аҧсуа хыҧхьаӡаратә дырга аҭаны закәанла дшалалаз.
Аҧсны Аҳәынҭқарра аҟынтә иара ихатә машьына дақәтәаны Урыстәылатәи Афедерациа далсны Финлиандиатәи Ареспублика дшалаз. Раҧхьаӡа акәны Аҧсны Аҳәынҭқарра атәылауаҩы ишәҟәы европа анҭыҵтәи амҳәыр ақәыргылан, финтәи аҳәааҿы аофициалтә докәмент аҳасабала ахархәарагьы аман.