Ҭырқәтәылантәи ҳашьцәа Аҧсныҟа раара, иарӷьажәҩаны рашьцәа иахьрывагылаз, аҭыҧантәи аҧсуаа даараӡа ргәы шьҭнахуан, ииашаҵәҟьаны, рыбла ҷыц еиҧш ирыхӡыӡаауан. Урҭ рахьтә иҟоуп Аиааира абара иахьӡаз, иҟоуп ҳаӷацәа рхымҭа изацәымцазгьы. Зафер Аргәын, акырӡа дазгәышьуан аҭынч ҧсҭазаара, иҧсадгьыл аҟны анхара, аха илахьынҵа иеижьеит. Аибашьра анцоз аамҭазы иҧсҭазаара ҿахҵәеит. Зафер Аргәын дҭахеит 1993ш. мшаҧымза 5 рзы. Анышә дамадоуп Гәдоуҭа аиашьаратә нышәынҭраҿы. Игәалашәара лаша наунагӡа иҳацзаауеит. Еизҳауа абиҧарақәа еиҭарҳәалап, аҭоурых иазынрыжьып Зафер еиҧш афырхацәа рыгәаӷьра, рхымҩаҧгара! Аҧсадгьыл шәзыразуп!
Аҧсны Аџьынџьтәылатә еибашьра ианалага, Ҭырқәтәылантәи зҭоурыхтә ҧсадгьыл бџьаршьҭыхла ахьчараз иааз арҧарцәа дыруаӡәкуп Бурса иаҵанакуа Инегиол ақалақь аҟны инхоз Зафер Аргәын. Аибашьҩы, раҧхьаӡа акәны иабдуцәа рџьынџь дгьыл ишьапы ықәиргылеит иуаажәлар амца шыра ианалагылаз, еиҳа ианыуадаҩыз аамҭазы.