Лыҧшәма, Шьамтәылатәи Ареспублика аинрал, шықәсқәак раҧхьа здунеи зыҧсахыз Уалид Маршьани Жансет Казанҧҳаи рҭоурыхтә ҧсадгьыл гәыла-ҧсыла иадҳәалан, уа инхо ҳџьынџьуааи ҳареи ҳаимадара аус азы акырӡа рылша рацәан. Иахьынхоз атәылаҿы ҳаҭыр-пату рықәын, аҳәынҭқарратәи ауаажәларратәи усқәа рнапы рылакын. Аҧсны имҩаҧысуаз аҭоурыхтә ҵакы змаз ахҭысқәа излауаз ала рхы агдырхомызт, аҿар ирыларааӡон Аҧсадгьыл иамаз аҵакы закәыз. Шьамтәылатәи Арабтә Республика ашьақәыргылареи ахьчареи рус иадгылан, уаҟа ицоз аибашьраҿы рҧацәа руаӡәк хьыӡла-ҧшала дҭахахьан.
Жансет Казанҧҳа, аҧсҭазаараҿы акыр аҧышәарақәа дшырхысхьазгьы, ҩныҵҟала акыр дыӷәӷәан, лгәырҩа даиааины лыуаажәлар дрылагылан, дыҧҳәыс аамысҭашәан, дҟәыӷан, лҭеиҭыҧш иацназгоз агәаҭа лызҭан. Лгәалашәара лаша наунагӡа иҳацзаауеит.