Аҽырыҩра еицеиҿыркааит Қоџьаели ақалақь аҟны иаҧҵоу аҧсуа культуратә центр, Ҭырқәтәыла Ақыҭанхамҩа аминистрра, Қоџьаели ақалақь администрациа. Қоџьаели ақалақь аҟны аус зуа аҧсуа культуратә центр ахантәаҩы, "Ахьӡ-Аҧша" аорден lll аҩаӡара занашьоу Ҳасан Қардиа иазгәеиҭеит, Кавказтәи аибашьра иалаӡыз ргәалашәара аҳаҭыр азы Ҭырқәтәыла раҧхьаӡа акәны ишаҧҵоу аҽырыҩра, насгьы аусмҩаҧгатә аиҿкаараҟны еиуеиҧшым ауадаҩрақәа цәырҵзаргьы, рыӡбара шалыршахаз.
Аиҧхныҩра иалагоит 19:30 сааҭ рзы. Аиҧхныҩра абжьаӡара 1900 метра ыҟоуп. l аҭыҧ азы аҧхьахә иартәоит - 77000 аҭырқәа лир, ll аҭыҧ - 30800 аҭырқәа лир, lll аҭыҧ -15400 аҭырқәа лир. Аҧсадгьыл ахь ахынҳәразы аҳәынҭқарратә еилакы «Facebook» адаҟьаҿы ишиашоу ицо аефир ала аусмҩаҧгатә ӡырнагоит.