Ас еиԥш иҟаҵаз ашьаҿа, ҳҳәынҭқарра ашьақәгылара аҿиараҟны аҭыԥ ду ааннакылеит.
Еиуеиԥшым ашықәсқәа рзы, Аԥсадгьыл ахь ахынҳәразы аҳәынҭқарратә еилакы напхгара арҭон ҳаҭыр зқәыз, зԥышәа ҳаракыз ауаа. Дара ирылдыршеит арепатриациа аус аҟны рлагала аарԥшра.
30 ш. раахыс аҳәынҭқарратә еилакы иалнаршеит еиуеиԥшым ахырхарҭақәа рыла апроектқәа рынагӡара, зҭоурыхтә ԥсадгьыл ахь ихынҳәыз ҳџьынџьуаа рыдгылара, ацхыраара рыҭара.
Аԥсадгьыл ахь ахынҳәразы аҳәынҭқарратә еилакы анапхгареи аусзуцәеи рҭакԥхықәра нагӡо, есҽны арепатриациа апроцессқәа ирылахуп. Урҭ рахьтә аӡәырҩы аилак анышьақәгылаз амш инаркны иахьа уажәраанӡа аус руеит, еизҳауа абиԥара рԥышәа рымдауа.
Аӡәаӡәала иҭабуп ҳәа раҳҳәоит аҵак ду змоу агәырӷьаратә мшы ҳадызныҳәало - Аԥсадгьыл ахь ахынҳәразы аҳәынҭқарратә еилакы 30 ш. ахыҵра амш.
Иҭабуп ҳәа раҳҳәоит аҳәаанырцәтәи атәылақәа рҿы инхо ҳдиаспора ахаҭарнакцәа, хыԥхьаӡара рацәала иаарышьҭуа адныҳәаларақәеи, ажәаԥхақәеи рзы.
Адунеи ахьынӡанаӡааӡо иҟазааит аҭынчра!
Иҳазгәакьоу ҳашьцәа, ҳаҳәшьцәа, шәҭоурыхтә ԥсадгьыл- Аԥсны шәзыԥшуп!