Аиԥылараҟны ирзааҭгылан ҳдиаспореи ҳареи ҳаимадара арҿиареи арӷәӷәареи ирызкыз азҵаарақәа жәпакы, иара убас арепатриациазы аҳәынҭқарратә еилаки Аҧсуа культуратә центрқәа рфедерациеи аҧхьаҟатәи русеицзура. Левенҭ Аҭрышба, Аҧсуа делегациа аилазаара иҭабуп ҳәа реиҳәеит Аҧсуа Федерациа изаамҭанытәиу аабатәи аизара ду рхы ахьаладырхәыз. Аҧсадгьыл ахь ахынҳәразы аҳәынҭқарратә еилакы ахантәаҩы Вадим Ҳаразиа дазааҭгылеит ахеилак имҩаҧнаго аусура атәы.
Иахьатәи аизара иалахәын Арепатриациазы аҳәынҭқарратә еилакы ахантәаҩы Вадим Ҳаразиа, Аҧсны Жәлар Реизара адепутат Инар Гыцба, арепатриациазы ахеилак аусзуцәа Аслан Сангәылиа, Енвер Чамагәуа, Денис Ҵәыџьба, Ҭырқәтәылатәи Ареспубликаҿы иҟоу Аҧсны Аҳәынҭқарра ахаҭарнак Ибрагим Аҩӡба, Очамчыра араионтә еизара адепутат Асҭанда Џьапуаҧҳа.