Абҵарамза 5 рзы, Арабтәи Ареспублика Египет, Каир ақ. аҟны имҩаҧысит Аҧсадгьыл ахь ахынҳәразы аҳәынҭқарратә еилакы ахантәаҩы Вадим Ҳаразиа напхгара ззиуа Аҧснытәи аделегациеи Арабтәи Ареспублика Египет иҟоу Урыстәылатәи Афедерациа азинмчы нагӡа змоу ахаҭарнак Георги Борисенкои реиҧылара. Аиҧылара аҧхарра ду аҵаны имҩаҧысит. Аҧснытәи аделегациа анапхгаҩы Вадим Ҳаразиа ацҳаражәҳәаҩ изеиҭеиҳәеит Каирҟа раара хықәкыс иамоу - Аҧсуа культуратә центр аҧҵара, уаҟа инхо аҧсуа диаспора еидызкыло. Иара убас иазгәеиҭеит, Урыстәыла Ахаҭарнакра инанагӡо ароль атранзиттә визақәа реиқәыршәара аус аҟны, уи ада Египет инхо ҳдиаспора рҭоурыхтә ҧсадгьыл аҭаара шрылымшо. Египет иҟоу Урыстәылатәи Афедерациа азинмчы нагӡа змоу ахаҭарнак Георги Борисенко иҳәеит, излауала ари аус ацхыраара шарҭо. Аделегациа анапхгаҩы ицәажәараҟны иазгәеиҭеит, аҳәаанырцә еиҿкаау Аҧсуа Культуратә центрқәа русура атәы. Аиҧылара ахыркәшамҭазы Вадим Ҳаразиа, Урыстәылатәи Афедерациа азинмчы нагӡа змоу ахаҭарнак Георги Борисенко агәаларшәагатә ҳамҭа ианеишьеит.
Ишәгәалаҳаршәоит, Аҧснытәи аделегациа аилазаараҟны ишыҟоу: Аҧсадгьыл ахь ахынҳәразы аҳәынҭқарратә еилакы ахантәаҩы Вадим Ҳаразиа, арепатриациазы аҳәынҭқарратә еилакы аиҿкаара-зиндырратә ҟәша аиҳабы Аслан Сангәлиа, арепатриациа Афонд аиҳабы ихаҭыҧуаҩ Асҭамыр Џьынџьал, Аҧсны Жәлар Реизара адепутатцәа, Ҭырқәтәылатәи Ареспубликаҟны иҟоу Аҧсны Аҳәынҭқарра азинмчы нагӡа змоу ахаҭарнак Ибрагим Аҩӡба.