Арҭ амшқәа рзы Аҧснытәи аделегациа аусуратә ныҟәарақәа рҳәаақәа ирҭагӡаны Ҭырқәтәылатәи Ареспублика иаҭааит. Аделегациа аилазаараҟны иҟоуп: Аҧсадгьыл ахь ахынҳәразы аҳәынҭқарратә еилакы ахантәаҩы иабжьгаҩ Вадим Ҳаразиа, аилак аиҿкаара-азинтә усбарҭа аиҳабы Аслан Сангәлиа. Аидеологиатә ҟазшьа шьаҭас измоу аусура аамҭа иалагӡаны иазгәаҭоуп Ҭырқәтәыла еиҿкаау аҧсуа культуратә хеидкылақәа рнапхгаҩцәеи арепатриациазы аҳәынҭқарратә еилакы ахаҭарнакцәеи реиҧылара. Ирылацәажәараны иҟоуп Аҧсадгьыл ахь ахынҳәразы аҳәынҭқарратә еилакы имҩаҧнаго апроект "Ахьышьҭрахь 2025" иадҳәалоу азҵаарақәа. Уи азкуп ҳџьынџьуаа злаху аҧхынтәи аҿартә лагер Аҧсныҟа раагара. Иара убас, иазгәаҭоуп ажурналист Фаина Матуа авторс дызмоу хыхәҭакны ишьақәгылоу адокументалтә фильм "Сыхьҭашьуеит" аӡыргара ( Аҧсны жәлар Рџьынџьтәылатә еибашьра 1992-1993ш.ш. иазкны ҳџьынџьуаҩ Беқьыр Ашәба игәалашәарақәа ирылху). Афильм дырбахоит Ҭырқәтәылатәи Ареспублика абарҭ ақалақьқәа рҟны: Сҭампыл, Диузџьа, Сақариа. Апроект харџьла ацхыраара азҭаз рхыҧхьаӡараҟны иҟоуп Аҧсадгьыл ахь ахынҳәразы аҳәынҭқарратә еилакы.