Сҭампыл ақалақь аҟны имҩаҧысит Аҧсадгьыл ахь ахынҳәразы аҳәынҭқарратә еилакы ахантәаҩы иабжьгаҩ Вадим Ҳаразиеи, аилак аиҿкаара-азинтә усбарҭа аиҳабы Аслан Сангәлиеи, Кавказтәи акультуратә центрқәа Рфедерациа ахантәаҩы Иунал Халавеи реиҧылара. Уаҟа ирзааҭгылан есышықәса арепатриациазы аҳәынҭқарратә еилакы еиҿнакаауа аҧхынтәи аҿартә лагер "Ахьышьҭрахь 2025" иадҳәалаз азҵаатәқәа. Ҳазҭоу ашықәс азы Аҧсадгьыл ахь ахынҳәразы аҳәынҭқарратә еилакы иазҧхьагәаҭан иамоуп хетапкны ишьақәгылоу аҧхынтәи алагер амҩаҧгара. Кавказтәи акультуратә центрқәа Рфедерациа аҟынтә актәи аетап аҟны ҳџьынџьуаа рхыҧхьаӡара ҩынтәны еизырҳауп, 14 ш. инаркны 17 ш. зхыҵуа ахәыҷқәа рхыҧхьаӡара 40-ҩык рҟынӡа инаӡоит. Аиҧылараҟны ирылацәажәан ҳџьынџьуаа рҭоурыхтә ҧсадгьыл ахь рыхынҳәра иадҳәалоу азҵаатәқәа. Аиҧылара мҩаҧысит аҧхарра зцыз аиҩызаратә ҟазшьа аҭаны.