Аҧсны Аҳәынҭқарра, ақ.Аҟәа Сахаров имҩа, №33
+7840 226 - 28 - 58
info@repatriatera.org
Цәыббрамза 1 - аҵарадырра иамшуп
01 Цәыббра 2023
Ҳаҭыр зқәу аҵаҩцәа!
Ҳаҭыр зқәу арҵаҩцәа, аҭаацәа!
Гәык-ҧсык ала ишәыдаҳныҳәалоит аҵарашықәс ҿыц алагамҭа. Ари аныҳәа ус баша иахьӡым - аҵарадырра амш ҳәа. Ашкол аҧсҭазаара, уаҟа имҩаҧысуа амшқәа, ашықәсқәа, дарбанызаалак изы акырӡа аҵанакуеит. Ашкол аҟноуп ауаҩытәыҩса ихаҭара ахьышьақәгыло, аҧхьаҟатәи изаанаҭ ашьаҟа ахьаиуа.
Акыр иаҧсоу арҵаҩцәа! Ишәыгымзааит агәабзиара, агәамч, шәнапы злаку аусқәа рҟны аихьӡарақәа. Шәнапы иҵышәхуа, аџьабаа здыжәбало шәҵаҩцәа, рыҧсадгьыли рыуаажәлари рзы ихьӡырҳәагақәаны иҟалааит. Аҭаацәа, шәыхшара рыла шәгәы еизҳалааит, насыҧ шәымазааит. Аҵаҩцәа, еснагь аҵарадырра шәхы азкыдзааит, иреиҳау аҩаӡарақәа шәрызнеилааит!
Мҩамш!
Нанҳәамза 15 - Аҧсны хатәгәаҧхарала еибашьуаз ирымшуп
15 Нанҳәа 2023
Нанҳәамза 15 - Аҧсны хатәгәаҧхарала еибашьуаз ирымшуп. Зыҩнқәа, зҭаацәа, зусурақәа ныжьны иааз аибашьцәа-афырхацәа ирымшуп. Аҧсны ахақәиҭреи, ахьыҧшымреи, аиашареи рыхьчаразы бџьаршьҭыхла иқәҧон. Ҭырқәтәылантәи, Шьамтәылантәи, Иорданиантәи, Нхыҵ-Кавказынтәи Аҧсны зыхьчоз рфырхаҵара хашҭра ақәым. Аиааира иахьымӡаз хатәгәаҧхарала еибашьуаз ҳфырхацәа ргәалашәара лашазааит, рҿаҧхьа ҳхырхәоит.
Иахьа, аҳҭнықалақь Аҟәа ҳџьынџьуаа рзы еиҿкаан аныҟәарақәа жәпакы. Агәыҧқәа реиҳабацәа рыцны аботаникатә баҳча иаҭааит. Анаҩс, Аҧснытәи аҳәынҭқарратә тәылаҿацәҭҵааратә музеи аҟны аҿар ирзеиҭаҳәан аҭоурых, идырбан аҟәшақәа еидыркыло аекспонатқәа. Ҳҭоурых иаҿахәҳәагоу, ажәытәра ахаҿра аазырҧшуа амаҭәахәқәа акыр иблахкыган. Хымҧада, ҳџьынџьуаа хәыҷқәа гәахәарыла ирыдыркылеит лабҿаба ирбаз-ираҳаз зегьы.
Иахьа, иара убас И. Папасқьыр ихьӡ зху амилаҭтә библиотека аиҳабы Борис Ҷолариа иҟаиҵаз ааҧхьарала, аҳәаанырцәынтәи Аҧсны зыҧсшьарамшқәа зхызго ҳхылҵшьҭрақәа аҭагылазаашьа рыман абиблиотека аҭаара. Борис Ҷолариа ҳџьынџьуаа ирзеиҭеиҳәеит изҭааз ахыбра аҭоурых, ауадақәа ирыҩнысны игәарҭеит. Урҭ ҳамҭас ириҭеит арҵагатә шәҟәқәа, акультуратә центрқәа рҟны ианнеилак, анаҩсқ еихшаны ирзыршоит. Ахәыҷқәа ракәзар ирҳәеит, Аҧсны изҭааз аҭыҧқәа зегьы шыргәаҧхо, аҧхьаҟагьы алшара роуны ианыҟала, ҩаҧхьа ишаауа.
Нанҳәамза 14 - Аҧсны аҭоурых адаҟьақәа рҿы итрагедиатәу рыцхәны иаанхоит. Убри аҽноуп, 413 мши-ҵхи ицоз аибашьра ахы анакы. Зықьҩыла аҭынч уааҧсыреи афырхацәеи рхы ақәырҵеит Аҧсадгьыл ахьчара. Игәалашәара лашазааит акомандаҟаҵаҩ хада Владислав Арӡынба. Ргәалашәара наӡаӡазааит Аҧсны Аиааира азаазгаз иреиӷьыз аҵеицәа, ҳџьынџьуаа, хатәгәаҧхарала иҳацеибашьуаз зегьы. Рҿаҧхьа ҳхырхәоит 413 мши-ҵхи бџьаршьҭыхла ҳаҧсадгьыл зыхьчоз аветеранцәа, агәабзиареи агәамчи рзеиӷьаҳшьоит. Аҧсны жәлар аҭынчреи агәабзиареи рымазааит.
Ҳаҭыр зқәу, Мусса Ҳабал-иҧа!
Аҧсадьыл ахь ахынҳәразы аҳәынҭқарратә еилакы анапхгареи аусзуратә еилазаареи рыхьӡала, гәык- ҧсык ала ишәыдаҳныҳәалоит Шәирамшы! Ишәзеиӷьаҳшьоит агәабзиара, агәамч, шәнапы злаку аусқәа зегьы рҟны аихьӡарақәа! Шәара акырӡа шәлагала рацәоуп аҧсуа - абаза жәлар реидкылара, реимадара аус аҟны. Ҷыдала шәазыҟоуп аҳәаанырцә инхо ҳџьынџьуаа рҭоурыхтә ҧсадгьыл радыҧхьалара. Ҳзеиҧш усқәа рҟны иаашәырҧшуа ахаҵгыларазы иҭабуп ҳәа шәаҳҳәоит. Шәҿаҧхьа иқәгылоу шәыгәҭакқәа рынагӡараҟны аманшәалара шәыцзааит! Ҳазшаз илаҧш хаа шәхызааит! Ҽааныбзиала шәнеиааит!
Ҳџьынџьуаа аҭааит Гагра ақалақь
14 Нанҳәа 2023
Апроект "Ахьышьҭрахь" аҳәаақәа ирҭагӡаны, Аҧсны зыҧсшьарамшқәа зхызго аҿар, иахьа, рныҟәарақәа ирыцҵан Гаграҟа. Урҭ идырбан аҭыҧ ҧшӡарақәа, ирзеиҭаҳәан ақалақь аҭоурых. Ахәыҷқәа рзы даара игәырӷьаран адельфинари аҭаара. Зҭоурыхтә ҧсадгьыл абзиабара есааира изныруа ҳџьынџьуаа, Аҧсны рыҟазаара агәахәара ду рнаҭоит. Дара ражәақәа рыла, наунагӡа арахь нхара иаауагьы ҟалашт. Аделегациа алахәцәа рныҟәарақәа ҳәаақәырҵоит Аҧсадгьыл ахь ахынҳәразы аҳәынҭқарратә еилакы анапхгареи аусзуцәеи. Дара иҭабуп ҳәа рарҳәоит иахьатәи амш ахаҵгылара азҭаз зегьы.
Аҧсны зыҧсшьарамшқәа зхызго ҳџьынџьуаа Афон Ҿыц иаҭааит
14 Нанҳәа 2023
Аҳәаанырцәынтәи зҭоурыхтә ҧсадгьыл аҟны зыҧсшьарамшқәа зхызго ҳџьынџьуаа, иахьа, иаҭааит Афон Ҿыц. Урҭ ирыман алшара Афон ҿыцтәи аҳаҧы аҭалара, дара рзы уи акыр иблахкыган, иџьашьахәын. Иара убас, иаҭааит ауахәама, аберҭым, ақалақь аҭоурыхтә ҭынхақәеи, аҭыҧ ҧшӡарақәеи. Ирбаз - ираҳаз акырӡа ихнахит.
Аҧсадгьыл ахь ахынҳәразы аҳәынҭқарратә еилакы анапхгара иҭабуп ҳәа рарҳәоит, апроект "Ахьышьҭрахь" аҳәаақәа ирҭагӡаны, Аҧсынтәыла зыҧсы зшьо аҿар адгылареи ацхыраареи рызҭо зегьы. Ахәҭакахьала, Афон ҿыцтәи аныҟәарақәа рҟны ахаҵгылара аазырҧшыз Аҧсны Аҳәынҭқарра атуризм азы аминистрра, Афон Ҿыц иҟоу аҳаҧы анапхгара, ҳџьынџьуаа хәыҷқәа хәыда - ҧсада иахьрыдыркылаз.
Ишәгәалаҳаршәоит, Ҭырқәтәылантәи, Иорданиантәи, Ливанынтәи, Ҟарачы-Черқьесынтәи араҟа зыҧсы зшьо ҳџьынџьуаа 79-ҩык шыҟоу. Апроект "Ахьышьҭрахь" аусура хнаркәшоит нанҳәамза 22 рзы. Уаанӡа ҳхылҵшьҭрақәа рҭоурыхтә ҧсадгьыл аҟны ирзыҧшу алахҿыхреи агәырӷьареи зцу ауснагӡатәқәа маҷым. Мҩамш!
Апроект "Ахьышьҭрахь" аусура хацыркуп
14 Нанҳәа 2023
Аҳәаанырцәынтәи зҭоурыхтә ҧсадгьыл аҟны зыҧсшьаратә мшқәа зхызго аҿар, иахьа, Аҟәа ақ. Ахьӡ - Аҧша апарк иаҭааит, ҳаибашьцәа рбаҟа амҵан ашәҭқәа шьҭарҵеит. Анаҩс, Амшын Еиқәа аҿықә аҟны игылоу амҳаџьырқәа рбаҟа ашҟа ицеит. Иара убас, иаҭааит Аҧсны Аҳәынҭқарра раҧхьатәи Ахада Владислав Арӡынба анышә дахьамадоу Ешыра ақыҭа. Апроект "Ахьышьҭрахь" аҳәаақәа ирҭагӡаны Аҧсынтәыла зыҧсы зшьо ҳџьынџьуаа, Аҧсадгьыл ахь ахынҳәразы аҳәынҭқарратә еилакы ахантәаҩы Вадим Ҳаразиа, "Бзиала шәаабеит", - ҳәа раҳәауа аилак ахыбраҟны идикылеит. Иҳәеит ҳхылҵшьҭрақәа рҭоурыхтә ҧсадгьыл ахь раара иамоу аҵакы, рабдуцәа зныҵыз адгьыл иқәӷьацарц шахәҭоу.Иҳәеит ҳхылҵшьҭрақәа рҭоурыхтә ҧсадгьыл ахь раара иамоу аҵакы, рабдуцәа зныҵыз адгьыл иқәӷьацарц шахәҭоу. Иара убас иазгәеиҭеит, арепатриациазы аҳәынҭқарратә еилакы шаҧҵаз еиҳа ианыуадаҩӡаз аамҭазы, Аҧсны Аџьынџьтәылатә еибашьра анцоз. Агәаҳәара ааирҧшит рҭоурыхтә ҧсадгьыл еснагь рылаҧш ахызарц, гәыла-ҧсыла иадҳәалазарц. "Ахьышьҭрахь" алахәцәа зегьы ақәҿиарақәа рзеиӷьашьо иазгәеиҭеит, аҿар Аҧсны аҧсшьара мшқәа бзиа шырзыҧшу. Агәыҧқәа реиҳабацәа ракәзар, иҭабуп ҳәа ахырҳәааит аҧхарра зҵаз аиҧыларазы.
Иҧсҭазаара далҵит Аҧсны Аџьынџьтәылатә еибашьра аветеран, "Агәымшәараз" амедал занашьаз, Ҭырқәтәылантәи зҭоурыхтә ҧсадгьыл бџьаршьҭыхла изыхьчаз ҳџьынџьуаҩ Ерсын Чқәуа. Ауаҩы аамысҭашәа, ашьац иаӷрагылар ҳәа ишәоз, зыламыс ҳаракыз Ерсын Чқәуа, иҧсадгьыл иҧсеиҧш бзиа ибон, ижәлар рхьаа ихьаан, ргәырӷьара игәырӷьан. Араҟа иаҧиҵахьан аҭаацәара ҧшӡа, ирызҳауеит ихылҵ.
Аҧсадгьыл ахь ахынҳәразы аҳәынҭқарратә еилакы анапхгареи аусуратә еилазаареи гәалсра дула ирыдышшылоит Ерсын Чқәуа иуацәеи-иҭынхацәеи.
Аҧсныҟа иааит ҳџьынџьуаа хәыҷқәа
14 Нанҳәа 2023
Аҳәаанырцәтәи атәылақәа - Ҭырқәтәылантә, Иорданиантә, Ливанынтә, иара убас Нхыҵ - Кавказынтә, Аҧсныҟа иааит ҳџьынџьуаа рделегациа. Аделегациа аилазаараҟны иҟоуп хыҧхьаӡара рацәала ахәыҷқәа, аҿар, аҧсуа- абаза хылҵшьҭрақәа рхаҭарнакцәа. Агәыҧ иалоуп абас еиҧш иҟоу ажәлақәа : Ешба, Саӡба, Папба, Ҭарба, Қапба, Маан, Адлеиба, Лацәышба, Ашьхаруа, Цыба, уҳәа. Есышықәсеиҧш сынтәагьы, аҧхынтәи аҧсшьарамшқәа мҩаҧысуеит Аҧсадгьыл ахь ахынҳәразы аҳәынҭқарратә еилакы еиҿнакааз апроект "Ахьышьҭрахь" аҳәаақәа ирҭагӡаны. Ас еиҧш иҟоу апроект ахықәкы хадақәа ируакуп ҳџьынџьуаа рҭоурыхтә ҧсадгьыл радыҧхьалара, рыжәлантәқәеи дареи реибабара, рҩызцәеи дареи реибадырра, рыҧсадгьыл агәыбылра дыркра.
Иазгэаҭатәуп, иааидкыланы Аҧсны зыҧсшьарамшқәа зхызго аҿар реиҳабацәа налаҵаны 79-ҩык шыҟоу. Ҭырқәтәыла еиҿкаау Аҧсуа культуратә центрқәа рфедарциеи, Кавказтәи акультуратә центрқәа рфедерациеи ишьақәдыргылаз агәыҧ еиднакылоит 49-ҩык. Ливанынтәи иҟоуп 9 -ҩык, Иорданиантәи - 5-ҩык, Ҟарачы - Черқьесскынтәи - 16-ҩык.
Ливанынтәи, Иорданиантәи иааз ҳџьынџьуаа раҧхьаӡакәны Аҧсны рыҧсшьарамшқәа рхыргоит. Урҭ ара рыҟазаара иалагӡаны ахылаҧшра ҷыда рырҭоит Аҧсны Аҩныҵҟатәи Аусқәа рминистрра, Аҭагылазаашьа ҷыдақәа рзы аминистрра, Агәабзиарахьчара аминистрра уҳәа, изыхәҭоу аҳәынҭқарратә усбарҭақәа зегьы.
Ҳаҭыр зқәу ҳауаажәлар, шәарҭ ишәымоуп аҭагылазаашьа, шьак-дак еицалҵыз шәашьцәа, шәыжәлантәқәа рбара, рҭаара, рацәажәара, аҧхьаҟагьы аимадара арӷәӷәара. Еиҳа инарҭбаау аинформациа шәоурц азы абри аҭел аномер ашҟа шәасырц шәылшоит: 226-28-58.
Бзиала шәаабеит, ҳашьцәа! Аҧсадгьыл шәызгәыкуеит, шәыгәхьаанагоит! Аҧсны шәаҧшәымацәазааит!
More...
КӘТАӶЬЦӘАХЫЛҦА
26 Рашәара 2023
Рашәарамза 29 рзы, Р. Гәымба ихьӡ зху Аҧснытәи Аҳәынҭқарратә Филармониаҟны имҩаҧысуеит амультфильм "Кәтаӷьцәахылҧа" аӡыргара. Амультфильм аҧиҵеит Асҭамыр Кәыҵниа, Аҧсадгьыл ахь ахынҳәразы аҳәынҭқарратә еилакы ацхыраарала. Иалагоит асааҭ 19:00 рзы, аҩналара хәыда-ҧсадоуп.
КАВКАЗТӘИ АИБАШЬРА ИАЛАӠЫЗ РГӘАЛАШӘАРА АМШ
24 Лаҵара 2023
Кавказтәи аибашьра иалаӡыз ргәалашәара амш иазкны иаҧҵаз апрограмма аҳәаақәа ирҭагӡаны, Лаҵарамза 23 рзы имҩаҧысит Жәларбжьаратәи ашьапылампыл азы аицлабра-маҷ ахәыҷқәа 2012 ш. ииз рыбжьара.
ЛАҴАРАМЗА 21, АҦСНЫ
22 Лаҵара 2023
Лаҵарамза 21, 2023ш.рзы, Аҧсадгьыл ахь ахынҳәразы аҳәынҭқарратә еилаки Аҧсны Аҳәынҭқарра аҿари аспорти аусқәеи рхеилаки еицымҩаыргеит Кавказтәи аибашьра иалаӡыз ргәалашәара иазкыз аусмҩаҧгатәқәа.