Аҧсны Аҳәынҭқарра, ақ.Аҟәа Сахаров имҩа, №33
+7840 226 - 28 - 58
info@repatriatera.org
Аҧсадгьыл ахь ахынҳәразы аҳәынҭқарратә еилакы ахыбраҟны имҩаҧысит Ҭырқәтәылатәи Ареспублика аҟынтә Аҧсны иааны иҟоу аспортсменцәа рҧылара
11 Цәыббра 2024
Аҧсадгьыл ахь ахынҳәразы аҳәынҭқарратә еилакы ахыбраҟны имҩаҧысит Ҭырқәтәылатәи Ареспублика аҟынтә Аҧсны иааны иҟоу аспортсменцәа рҧылара.
Аиҧылара аартуа Аҧсадгьыл ахь ахынҳәразы аҳәынҭқарратә еилакы ахантәаҩы Вадим Ҳаразиа иазгәеиҭеит, аспортсменцәа рыҧсадгьыл ахь раара акыр агәахәа шырнаҭаз, аспорттә усхк аҟны ақәҿиарақәа рзеиӷьеишьеит. Иара убас, аделегациа ахада, Аҧсуа Федерациа алахәыла, Ҭырқәтәыла иҟоу аҧсуа қыҭа Калдахәара аиҳабы Ерџьаи Пачкориа, аҧсуа диаспора рҭоурыхтә ҧсадгьыл иаҭаартә алшара аҧызҵаз, еиҿызкааз зегьы ҭабуп ҳәа реиҳәеит.
Аиҧылара аҳәаақәа ирҭагӡаны имҩаҧысит аҧсуа милаҭтә хәмарра "Аимҵакьачара" жәларбжьаратәи атурнир иалахәыз ҳџьынџьуаа Аҧсны атәылауаҩшәҟәы ранашьара иазкыз аусмҩаҧгатә. Асасцәа гәаларшәагас иранашьан аҳамҭақәа.
Цәыббрамза 6, ихыркәшан аҧсуа милаҭтә хәмарра "Аимҵакьачара" ареспубликатә жәларбжьаратә турнир. Уи иалахәын Ҭырқәтәылатәи Ареспублика аҟынтә ҳџьынџьуаа.
Афиналтә хәмарраҟны Ҭырҭәтәылантәи аҧсуа диаспора злахәыз акоманда аҩбатәи аҭыҧ ааннакылеит, Ҷлоу ақыҭа акоманда аҧыжәара агеит, актәи аҭыҧ ааннакылеит. Абасала, ихыркәшахеит аҧсуа милаҭтә хәмарра "Аимҵакьачара" жәларбжьаратәи атурнир. Аиашьареи, аиҩызареи, аимадареи, аҧхьаҟагьы аҿиара бзиа аиуааит аспорттә хырхарҭала.
Ҳџьынџьуаа рхы аладырхәуеит аҧсуа милаҭтә хәмарра "Аимҵакьачара" иазку ареспубликатәи жәларбжьаратәи атурнир
04 Цәыббра 2024
Иахьа, Ҭырқәтәылатәи Ареспублика аҟынтә зҭоурыхтә ҧсадгьыл аҟны иҟоу ҳџьынџьуаа рделегациа ашәҭқәа шьҭарҵеит Алада Ешыра ақыҭан Аҧсны раҧхьатәи Ахада Владислав Арӡынба иҳаҭгәын аҟны, Аҧсны Аиааиреи Ахьыҧшымреи ргаразы Аџьынџьтәылатә еибашьраҟны иҭахаз ҳҵеицәа ргәаладыршәеит.
Ҳџьынџьуаа рхы аладырхәуеит аҧсуа милаҭтә хәмарра "Аимҵакьачара" иазку ареспубликатәи жәларбжьаратәи атурнир.
Анаҩс, астадион "Динамо" аҟны имҩаҧысит жәларбжьаратәи атурнир аартра. Аҧсуа милаҭтә хәмарра "Аимҵакьачара" иалахәуп Аҧсны араионқәа зегьы рҟынтә акомандақәа, иара убас Ҭырқәтәыла инхо аҧсуаа рыла ишьақәгыло акоманда.
Аиҧылара аартуа, Аҧсадгьыл ахь ахынҳәразы аҳәынҭқарратә еилакы ахантәаҩы Вадим Ҳаразиа атурнир алахәцәа ирзеиӷьеишьеит аихьӡарақәа, ахәмарра ласы. Иара убас иазгәеиҭеит, ҳџьынџьуаа ари атурнир иахьалахәу аҵак ду шамоу, аҧсуа диаспора рҭоурыхтә ҧсадгьыл радыҧхьалара аус аимадара арӷәӷәара ишацхраауа.
Атурнир еиҿыркааит Аҧсадгьыл ахь ахынҳәразы аҳәынҭқарратә еилакы, Адунеизегьтәи аҧсуа-абаза аконгресс, Аҿари аспорти русқәа рзы аҳәынҭқарратә еилакы. Атурнир мҩаҧысуеит цәыббрамза 6-нӡа.
Нанҳәамза 30 ҳџьынџьуаа ауада ҿыцқәа рцаԥхақәа рыҭан
03 Цәыббра 2024
Нанҳәамза 30, Аԥсадгьыл ахь ахынҳәразы аҳәынҭқарратә еилакы ахыбраҟны 24 ҭаацәара ауада ҿыцқәа рцаԥхақәа рыҭан.
24 уада рахьтә - 15 уада ҩҿык рыла ишьақәгылоуп, иҟоуп ҿык змоу жәуадак. Арепатриантцәа ауада ҿыцқәа рыҭоуп хеихагылакны иҟоу аҩнаҟны Гәылрыԥшь араион Маҷара ақыҭан.
Ауадақәа зауз рхыԥхьаӡара аҟны иҟоуп 1992ш.-1993ш. рзы Аԥсны Аџьынџьтәылатә еибашьра иалахәыз, Нхыҵ-Кавказынтәи хатәгәаԥхарала иааз аибашьцәа, Аԥсны Афырхацәа, иара убас Ҭырқәтәылантәи иааз ҳџьынџьуаа. Ауадақәа зауз рсиаҟны иарбоуп 2012 ш. рзы Шьамтәылантәи иааз ҳашьцәа, иахьа уажәраанӡа қьырала ауадақәа ирыҩназ, урҭ рхыԥхьаӡара ԥшьба-хәба ҭаацәара рҟынӡа инаӡоит. Абри аҩнаҟны ауадақәа роуит хҩык инареиҳаны ахшара змоу, зхала зхәыҷқәа зааӡо анацәа, зыԥшәмацәа зыԥсҭазаара иалҵхьоу. Иҟоуп иара убас, Аԥсны Аҩныҵҟатәи аусқәа рминистрра аҟны аус зуа ҳашьцәа, урҭгьы аҭаацәара иалоу, ҩыџьа ахшара иреиҵамкәа измоу. Ахшара рацәа змоу аҭаацәара, категориала иаҵанакуа роуп зегьы. Зыӡбахә ҳәоу аҭаацәарақәа , шықәсқәак раахыс Аԥсны қьырала ауадақәа ирыҩнан. Иҟан зхатә харџь ала изшәақәоз, иҟан иара убас арепатриациазы аҳәынҭқарратә еилакы апрограмма иашәоз.
Аԥсадгьыл ахь ахынҳәразы аҳәынҭқарратә еилаки Аҳәынҭқарратә еилазаара "Аԥсныргылара" ирыбжьаз аиқәшаҳаҭра инақәыршәаны, ԥхынгәымза 16, ҳазҭоу ашықәс азы, арепатриациазы аҳәынҭқарратә еилакы ахархәарахь иаҭан Маҷара ақыҭан игылоу ауада рацәа змоу аҩны. Аԥхьаҟа ас еиԥш иҟоу аргыларатә усқәа еиҭазгәаҭоуп.
Аҩнеихагыла акәзар, ҳаамҭа иақәшәоу ахархәагақәа рыла еиқәыршәоуп, анхаразы аҭагылазаашьа бзиақәа аԥнаҵоит.
Аԥсадгьыл ахь ахынҳәразы аҳәынҭқарратә еилакы адырра ҟанаҵоит ҳџьынџьуаа Аԥснытәи Аҳәынҭқарратә Университет рҭаҵаразы адкылара шымҩаԥысуа
Арепатриациазы аҳәынҭқарратә еилакы есышықәсатәи апрограмма аҳәаақәа ирҭагӡаны алаҳәара ҟанаҵоит аҳәаанырцә инхо ҳџьынџьуаа Аԥснытәи аҳәынҭқарратә университет аҟны аҵара рҵарц азы адкылара шымҩаԥысуа.
Аҵара аҿҳәара дара иалырхуа афакультет иадҳәалоуп, уахь иаҵанакуеит абызшәа аҽазыҟаҵаразы ихымԥадатәиу акурсқәа рахысра. Аԥсадгьыл ахь ахынҳәразы аҳәынҭқарратә еилакы ахарџьқәа зегьы ахахьы иагоит, раара, рҵара уҳәа, иара убас қәҿиарала аҵара зҵо астудентцәа астипендиа рызшәалахоит.
Арзаҳалқәа рыдкылахоит 2024ш. нанҳәамза 30-нӡа. Еиҳа ихаҭәаау аинформациа шәоурц азы ҳџьынџьуааи ҳареи ҳаимадара аҟәша шәадҵааларц шәылшоит:
Аҭел: +7 940 995 49 95 (WhatsApp)
Нанҳәамза 15 - Аҧсны хатәгәаҧхарала еибашьуаз ирымшуп
15 Нанҳәа 2024
Нанҳәамза 15 - Аҧсны хатәгәаҧхарала еибашьуаз ирымшуп. Зыҩнқәа, зҭаацәа, зусурақәа ныжьны иааз аибашьцәа-афырхацәа ирымшуп. Аҧсны ахақәиҭреи, ахьыҧшымреи, аиашареи рыхьчаразы бџьаршьҭыхла иқәҧон. Ҭырқәтәылантәи, Шьамтәылантәи, Иорданиантәи, Нхыҵ-Кавказынтәи Аҧсны зыхьчоз рфырхаҵара хашҭра ақәым. Аиааира иахьымӡаз хатәгәаҧхарала еибашьуаз ҳфырхацәа ргәалашәара лашазааит, рҿаҧхьа ҳхырхәоит.
Нанҳәамза 14 - Аҧсны аҭоурых адаҟьақәа рҿы итрагедиатәу рыцхәны иаанхоит. Убри аҽноуп, 413 мши-ҵхи ицоз аибашьра ахы анакы. Зықьҩыла аҭынч уааҧсыреи афырхацәеи рхы ақәырҵеит Аҧсадгьыл ахьчара. Игәалашәара лашазааит акомандаҟаҵаҩ хада Владислав Арӡынба. Ргәалашәара наӡаӡазааит Аҧсны Аиааира азаазгаз иреиӷьыз аҵеицәа, ҳџьынџьуаа, хатәгәаҧхарала иҳацеибашьуаз зегьы. Рҿаҧхьа ҳхырхәоит 413 мши-ҵхи бџьаршьҭыхла ҳаҧсадгьыл зыхьчоз аветеранцәа, агәабзиареи агәамчи рзеиӷьаҳшьоит. Аҧсны жәлар аҭынчреи агәабзиареи рымазааит.
Аҳәаанырцәынтәи зыҧсадгьыл аҟны зыҧсшьарамшқәа зхызго ҳџьынџьуаа Очамчыра ақалақь иаҭааит
08 Нанҳәа 2024
Аҧсадгьыл ахь ахынҳәразы аҳәынҭқарратә еилакы анапхгареи, аҧхынтәи алагерь "Ахьышьҭрахь" алахәцәеи , Очамчыра ақалақь аҟны, 1992-1993ш.ш. рзы Аҧсны Аџьынџьтәылатә еибашьраҟны иҭахаз рыхьӡала иргылоу абаҟа амҵан ашәҭқәа шьҭарҵеит. Р. А. Ҵәыџьба ихьӡ зху Акультура аҩнаҟны асасцәа рзы еиҿкаан ихаҭәааз аконцерттә программа. Ҳџьынџьуаа рҭоурыхтә ҧсадгьыл аҟны ироуз аҧхарра агәахәара рнаҭеит.
Иахьа, Аԥсадгьыл ахь ахынҳәразы аҳәынҭқарратә еилакы ахыбраҟны имҩаԥысит аԥхынтәи алагерь "Ахьышьҭрахь" алахәцәеи, Аԥсны Аҳәынҭқарра актәи аԥыза -министр, афымцамчи атранспорти рминистр Џьансыхә Нанбеи, Аԥсны Аҳәынҭқарра Ахада Иусбарҭа анапхгаҩы ихаҭыԥуаҩ Зураб Қаџьаиеи реиԥылара. Џьансыхә Нанбеи Зураб Қаџьаиеи рықәгыларақәа рҟны ирҳәеит, Аԥсныжәлар рзы акырӡа шаҵанакуа апроект "Ахьышьҭрахь" иааннакыло аҵакы, уи аиҿкаара шабзоуроу Аԥсадгьыл ахь ахынҳәразы аҳәынҭқарратә еилакы. Дара, алагерь алаҳәцәа зегьы гәыблыла аԥсшәа раҳәауа иазгәарҭеит, ҳџьынџьуаа рабдуцәа, рабацәа аамҭаказы изныҵхьаз рыԥсадгьыл аҭаара даара ишыхҭыс дуу, рбара акырӡа ишеигәырӷьаз. Иҭабуп ҳәа рарҳәеит алагерь аиҿкаара зыбзоуроу Арепатриациазы аҳәынҭқарратә еилакы анапхгареи, аколлективи, иара убас Гәдоуҭа ақалақь Аусбарҭа ахада Валери Аҩӡбеи, С. П. Дбар ихьӡ зху Аԥсны Жәлар Рџьынџьтәылатә еибашьра аҳәынҭқарратә музеи адиректор Гәгәыца Џьыкырԥҳаи, ахәаанырцәынтәи иааз ҳџьынџьуаа гәаартыла иахьырԥылаз. Аҿар ракәзар ирҳәеит, рҭоурыхтә ԥсадгьыл аҟны рыҟазаара даара ишыргәаԥхаз, Аԥсны ауаажәларреи, аԥсабара аԥшӡареи акыр ишыхнахыз.
Аиԥылара ахыркәшамҭазы, Аԥсны Аҳәынҭқарра актәи аԥыза -министр, афымцамчи атранспорти рминистр Џьансыхә Нанбеи, Аԥсны Аҳәынҭқарра Ахада Иусбарҭа анапхгаҩы ихаҭыԥуаҩ Зураб Қаџьаиеи, Аԥсны Аҳәынҭқарра Ахада ихьӡала алагерь алахәцәа хыԥхьаӡара рацәала ҳамҭас ирырҭеит ашәҟәы -афотоальбом "Ахьыԥшымра".
Уаҵәы, ҳџьынџьуаа аҭаараны иҟоуп Очамчыра ақалақь.
Аҳәаанырцәынтәи зҭоурыхтә ҧсадгьыл аҟны зыҧсшьарамшқәа зхызго аҿар,ақалақь-фырхаҵа Гәдоуҭа иаҭааит
01 Нанҳәа 2024
Аҳәаанырцәынтәи зҭоурыхтә ҧсадгьыл аҟны зыҧсшьарамшқәа зхызго аҿар, ақалақь-фырхаҵа Гәдоуҭа иаҭааит. Дара ашәҭқәа шьҭарҵеит Аҧсадгьыл ахьчаҩцәа рбаҟа амҵан, иара убас Лаҭатәи атрагедиа иахҟьаны иҭахаз рмемориал аҟны. Анаҩс, аҧхынтәи алагерь "Ахьышьҭрахь" алахәцәа, С. П. Дбар ихьӡ зху Аҧсныжәлар рџьынџьтәылатә еибашьра аҳәынҭқарратә музеи аҟны аныҟәарақәа рзеиҿкаан, амузеи аекспонатқәа рҭоурых рзеиҭаҳәан. Амҳаџьырқәа рыхьӡ зху азал еиҿкаан 2023ш. рзы. Амузеи аҟны ицәыргақәҵоуп Ҭырқәтәылантәи, Иорданиантәи, Шьамтәылантәи зыҧсадгьыл ахьчара зхы ақәызҵаз ҳџьынџьуаа рфотосахьақәа, ашәҟәқәа, рхатә шәҵатәқәа. Аделегациа алахәцәа алшара рыман аҭоурыхтә ҭыҧ ҧшьа "Лыхнашҭа" аҭаара, жәытә-натә аахыс аҧсуа жәлар рлахьынҵа ахьырыӡбоз. Ҳазҭагылоу аамҭазы Лыхнашҭа имҩаҧысуеит аныҳәатә хҭысқәа ирыдҳәалоу аицлабрақәа, аҽырыҩрақәа.
Аҧхынтәи алагерь "Ахьышьҭрахь" алахәцәа иааиуа амшқәа рзы аинтерес зҵоу аныҟәарақәа рзеиҿкаахоит.
More...
Ҳџьынџьуаа злахәу аҧхынтәи алагерь " Ахьышьҭрахь" рыҧсшьаратә мшқәа ирыцҵоуп. Иацы, урҭ аҭааит Аҧсны аҭыҧ ҧшӡарақәа ируакәу - Риҵа аӡиа. Иара убас, урҭ ирыман алшара Аӡҭачы иаҵәа абара аӡхыҽҽа аҭаара, агәаҭарҭатә ҭыҧқәа рҟынтәи Аҧсны аҧсабара агәылаҧшра. Ирбаз-ираҳаз зегьы акыр ихнахит, иагәыланахалеит.
Аҳәаанырцәынтәи Аҧсныҟа иааз ҳџьыынџьуаа рхыҧхьаӡара 98-ҩык рҟынӡа инаӡоит, урҭ рахьтә 45-ҩык Ҭырқәтәылантәи иаақәаз, Ливанынтәи 17-ҩык, Иорданиантәи 11-ҩык, Ҟарачы -Черқьесскынтәи 25-ҩык.
Аҧсны зыҧсшьарамшқәа зхызго ҳџьынџьуаа Афон Ҿыц иаҭааит
30 Ԥхынгәы 2024
Аҳәаанырцәынтәи зҭоурыхтә ҧсадгьыл аҟны зыҧсшьарамшқәа зхызго ҳџьынџьуаа, иахьа, иаҭааит Афон Ҿыц. Урҭ ирыман алшара Афон ҿыцтәи аҳаҧы аҭалара, дара рзы уи акыр иблахкыган, иџьашьахәын. Иара убас, иаҭааит ауахәама, аберҭым, ақалақь аҭоурыхтә ҭынхақәеи, аҭыҧ ҧшӡарақәеи. Ирбаз - ираҳаз акырӡа ихнахит.
Ишәгәалаҳаршәоит, Ҭырқәтәылантәи, Иорданиантәи, Ливанынтәи, Ҟарачы-Черқьесынтәи араҟа зыҧсы зшьо ҳџьынџьуаа 98-ҩык шыҟоу. Апроект "Ахьышьҭрахь" аусура хнаркәшоит нанҳәамза 5 рзы. Уаанӡа ҳхылҵшьҭрақәа рҭоурыхтә ҧсадгьыл аҟны ирзыҧшу алахҿыхреи агәырӷьареи зцу ауснагӡатәқәа маҷым. Мҩамш!
Аҳәаанырцәтәи ҳџьынџьуаа рделегациа Аԥсны иаҭааит
29 Ԥхынгәы 2024
Аԥсадгьыл ахь ахынҳәразы аҳәынҭқарратә еилакы аԥшьгарала, есышықәсатәи аԥхынтәи алагер апроект " Ахьышьҭрахь" аҳәаақәа ирҭагӡаны, ԥхынгәымза 27 рзы, Ҭырқәтәылантәи, Иорданиантәи, Ливанынтәи, иара убас Нхыҵ Кавказынтәи рҭоурыхтә ԥсадгьыл иаҭааит ҳџьынџьуаа рделегациақәа.
Аделагациақәа реилазаараҟны иҟоуп хыԥхьаӡара рацәала ахәыҷкәа, аԥсуа-абаза хылҵшьҭрақәа рҿар.
Апроект ахықәкы хадақәа ируакуп еиуеиԥшым атәылақәа рҟны инхо аԥсуаа реидкылара, реизааигәатәра.
Ҳџьынџьуаа Аԥсны рыҟазаара иалагӡаны идырбахоит рҭоурыхтә ԥсадгьыл аҭыԥ ԥшӡарақәа, иреилыркаахоит аԥсуаа рҭоурых, ркультура, рыбзазара.
Аԥсныҟа иааз ҳџьынџьуаа рхыԥхьаӡара 98-ҩык ыҟоуп, урҭ рахьтә 45-ҩык, Ҭырқәтәыла еиҿкаау Аԥсуа Культуратә центрқәа рфедерациеи Кавказтәи Акультуратә центрқәа рфедерациеи ишьақәдыргылаз асиа иалақәоу роуп, Ливанынтәи 17-ҩык, Иорданиантәи 11-ҩык, Ҟарачы-Черқьессктәи Ареспублика аҟынтә 25-ҩык.
Иахьа, ҳџьынџьуаа ашәҭқәа шьҭарҵеит Аҟәа ақ. Ахьӡ-Аԥша апарк аҟны анышә иамадоу ҳаибашьцәа рбаҟаҿы, анаҩс амҳаџьырқәа рбаҟа иаҭааит, иара убас Алада Ешыра ақыҭан, Аԥсны Аҳәынҭқарра Раԥхьатәи Ахада Владислав Арӡынба иҳаҭгәын аҟны ашәҭ шьыҵәрақәа шьҭарҵеит.
Аԥсадгьыл ахь ахынҳәразы аҳәынҭқарратә еилакы ахыбраҟны имҩаԥысит алагер алахәцәеи аилак ахантәаҩы Вадим Ҳаразиа знапхгараҟны дыҟаз аколлективи реиԥылара. Ахантәаҩы иқәгылараҟны иазгәеиҭеит, ҳџьынџьуаа рҭоурыхтә ԥсадгьыл раҭаара ишҭоурыхтә хҭыс дуу, иара убас ирзеиҭеиҳәеит аилак иамоу иҷыдоу аҵакы, избанзар иара аԥҵан Аԥсны еиҳа иуадаҩӡаз аамҭазы, Аԥсны Аџьынџьтәылатә еибашьра анцоз. Аиԥылара ахыркәшамҭазы, аԥхынтәи алагер "Ахьышьҭрахь" агәыԥқәа рхаҭарнакцәа иҭабуп даара ҳәа рарҳәеит ас еиԥш зымҽхак ҭбаау апроект аиҿкааҩцәа. Аиԥылара мҩаԥысит акыр аԥхарратә ҟазшьа аҭаны.
Ҧхынгәымза 23 рзы, Черқьесск ақалақь, акультуреи аҧсшьарҭеи ирызку абаҳча "Адгьылбжьаха иаҵәа" аҟны имҩаҧысит Абаза жәлар ркультура амш иазкыз аусмҩаҧгатә. Ахәылбыҽха, еиуеиҧшым аҭыҧқәа рҟны еиҿкаан анапҟазацәа рцәыргақәҵақәа, абаза бызшәала ирыҧхьон ажәеинраалақәа, ахәыҷқәа рзы иазгәаҭан авикторина, иреиҭьу амилаҭтә маҭәазы аицлабра. Иара убас, абаҳчаҟны ицәырган амилаҭтә чысхкқәа. Еизаз рҿаҧхьа иқәгылеит абаҩхатәра злоу Ҟарачы-Черқьесски Аҧсны Аҳәынҭқарреи рартистцәа.
Аусмҩаҧгатә рхы аладырхәит Аҧсадгьыл ахь ахынҳәразы аҳәынҭқарратә еилакы ахантәаҩы Вадим Ҳаразиа напхгара ззиуа Аҧснытәи аделегациа.